Пацалункі-падарункі
Мінімалістычнае, актуальнае рашэнне з яркім акцэнтам на прадукце, якое даступна і лаканічна перадае яго сутнасць.
![Пацалункі-падарункі-picture-26893 Пацалункі-падарункі-picture-26893](/upload/resize_cache/iblock/e9e/454_302_2/e9e87ff978d356cecbe4e875a1c7eb59.jpg)
Кампанія «Аржаніца» займаецца перапрацоўкай дзікарослых ягад у дэсерты з 1996 года, яе флагманскі прадукт — легендарныя журавіны ў цукровай пудры. Яго ўпэўнена можна назваць не толькі смачным ласункам, але і сапраўдным беларускім суперфудам — крыніцай вялікай колькасці прыродных вітамінаў. Прадукт унікальны для еўрапейскага рынку, і яго часта возяць за мяжу ў якасці падарунка з Беларусі.
Аднак ранейшы дызайн упакоўкі ўжо састарэў. Больш таго, ён не раскрываў сутнасці прадукту. Гандлёвай марцы былі патрэбны абнаўленне візуальнага вобразу, нэйм і яркая камунікацыя, якая распавядала б пра яе паходжанне і значнасць.
![Пацалункі-падарункі-picture-26909 Пацалункі-падарункі-picture-26909](/upload/resize_cache/iblock/6d9/454_302_2/6d94bc652dde64d7c82d3972ef95bb8c.jpg)
![Пацалункі-падарункі-picture-26910 Пацалункі-падарункі-picture-26910](/upload/resize_cache/iblock/b9e/454_302_2/b9eda3ae18ab03a5ae18bd2a80f21a11.jpg)
![Пацалункі-падарункі-picture-26911 Пацалункі-падарункі-picture-26911](/upload/resize_cache/iblock/018/454_302_2/01890d33e5e0674f1aac8f873174573d.jpg)
![Пацалункі-падарункі-picture-26912 Пацалункі-падарункі-picture-26912](/upload/resize_cache/iblock/33f/454_302_2/33fb3bdba5363ab1646d6c0bd876e78a.jpg)
![Пацалункі-падарункі-picture-26913 Пацалункі-падарункі-picture-26913](/upload/resize_cache/iblock/be3/454_302_2/be3be388850f6e033f75e7b720ff9c34.jpg)
![Пацалункі-падарункі-picture-26914 Пацалункі-падарункі-picture-26914](/upload/resize_cache/iblock/e70/454_302_2/e7067fa1cfa781fb661e9a4356587257.jpg)
Нэйм, лагатып і дызайн упакоўкі
Новы дызайн упакоўкі — мінімалістычнае сучаснае рашэнне з яркім акцэнтам на прадукце і фірмовых колерах — чырвоным і белым. Фотастыль на бакавіне адцяняе асноўнае дызайн-рашэнне — там ягада паказана ў натуральных умовах. А пад крышкай знаходзіцца інфармацыя пра важнасць падтрымкі прыродаахоўных мерапрыемстваў, якая счытваецца ў момант кантакту з брэндам.
Натуральна, камунікацыя для такога прадукту стваралася на беларускай мове. Яна пачынаецца з нэйма «Пацалункі-падарункі», які падкрэслівае каштоўнасць журавін як падарунка лесу, створанага з любоўю. Нэйм не толькі рытмічны, але і візуальна гарманічны дзякуючы падобнаму напісанню слоў. Яго падтрымліваюць УГП, што паказваюць карыснасць і натуральнасць прадукту.
Місія брэнда
Беларускія балоты — старажытныя прыродныя экасістэмы — гэта не толькі «лёгкія Еўропы», але і дом для кустоў журавін. Для вытворчасці прадуктаў пад брэндам «Пацалункі-падарункі» выкарыстоўваюцца менавіта дзікарослыя ягады, і кліент зацікаўлены ў захаванні і аднаўленні іх прыроднай экалагічнай нішы.
Вольга Кашкан, крэатыўны дырэктар Fabula Branding:
«Цыкл работы над праектам быў дастаткова доўгім, бо перад нашай камандай стаяла вельмі аб’ёмная задача — не толькі прэзентаваць сам прадукт і падкрэсліць яго аўтэнтычнасць, але і падтрымаць ініцыятыву па ахове беларускіх балот — спрадвечнай скарбніцы здароўя, дзе растуць гэтыя ягады. Пазіцыянаванне дзікарослых журавін як беларускі суперфуд — прадукт надзвычайнай вартасці, што па колькасці мікраэлементаў і вітамінаў не саступае замежным аналагам (ягады годжы, семя чыа, спіруліна і г.д.), упэўнена, звярне ўвагу беларусаў на мясцовыя каштоўнасці, якімі можна ганарыцца».
Юлія Янюк, дызайнер Fabula Branding:
«Журавіны ў цукры — беларускі прадукт, які я гадоў пятнаццаць важу сваім сябрам, калі еду ў госці за мяжу. Пераапрануць яго, зрабіць прыгожым, густоўным — гонар для мяне.
А яшчэ праз працу над праектам «Пацалункі-падарункі» я адкрыла для сябе нашыя балоты, дзе расце цудоўная ягада, з новага боку. Цяпер гэта для мяне не пра ціну-руціну, а пра экасістэму, якой каля 10 тысяч год, што дае яшчэ большае разуменне нашай краіны як адметнасці».
Анатоль Брылёнак, дырэктар ТДА ВКФ «Аржаніца»:
«Кампанія «Аржаніца» вырабляе журавінавае дражэ па ўласных тэхналогіях, якія маюць сусветную навізну, пацверджаную Еўразійскім патэнтам. На працягу шматлікіх гадоў наша фірма задзейнічана ў міжнародных праграмах прыродаахоўнага напрамку, якія накіраваны на захаванне балот і эфектыўнае выкарыстанне іх рэсурсаў. Мы разумеем, як важна фарміраваць экалагічны светапогляд, у тым ліку і з дапамогай абноўленай упакоўкі. Новы дызайн спадабаўся пакупніку, пра што сведчаць водгукі на нашым сайце і павелічэнне аб’ёмаў продажу прадукцыі. Акрамя таго, ужо паступілі прапановы аб пастаўках нашых ягад ў некалькі новых гандлёвых сетак».
Рэбрэндынг прадукту і абноўленая стратэгія развіцця дапамаглі кампаніі «Аржаніца» пачаць супрацоўніцтва з ПРААН, бо выкарыстанне сапраўдных прыродных кампанентаў у прадуктах харчавання — добры інструмент для прасоўвання прыродаахоўных мерапрыемстваў. Каб сфакусаваць увагу на экалагічнай праблеме і ахапіць пры гэтым розныя сегменты патэнцыйнай аўдыторыі, вытворца плануе выкарыстаць усе даступныя каналы. Таму сваё дызайн-рашэнне мы зрабілі максімальна адаптыўным для розных носьбітаў.
![Пацалункі-падарункі-picture-26900 Пацалункі-падарункі-picture-26900](/upload/resize_cache/iblock/4c3/454_302_2/4c33578b2859b728992c26ca4b3061f4.jpg)
![Пацалункі-падарункі-picture-26901 Пацалункі-падарункі-picture-26901](/upload/resize_cache/iblock/5ae/454_302_2/5aed1ca0c91725e66d0b8f45f43d3771.jpg)
![Пацалункі-падарункі-picture-26902 Пацалункі-падарункі-picture-26902](/upload/resize_cache/iblock/563/454_302_2/563183af2b7d3b15dadbffb6d5082505.jpg)
![Пацалункі-падарункі-picture-26903 Пацалункі-падарункі-picture-26903](/upload/resize_cache/iblock/5d7/454_302_2/5d7f05d9867f5f27493a5d4184963f43.jpg)
![Пацалункі-падарункі-picture-26904 Пацалункі-падарункі-picture-26904](/upload/resize_cache/iblock/c2f/454_302_2/c2fea9ba8ee9977656d9951deaabdf84.jpg)
![Пацалункі-падарункі-picture-26905 Пацалункі-падарункі-picture-26905](/upload/resize_cache/iblock/916/454_302_2/916f1d6e9a4797e70c011e592473a1a2.gif)
![Пацалункі-падарункі-picture-26906 Пацалункі-падарункі-picture-26906](/upload/resize_cache/iblock/097/454_302_2/097e788c0a6b15fe2d731250a5e03e3d.jpg)
![Пацалункі-падарункі-picture-26907 Пацалункі-падарункі-picture-26907](/upload/resize_cache/iblock/509/454_302_2/509845c7af496ea770e5bdfe0878ad77.jpg)
![Пацалункі-падарункі-picture-26908 Пацалункі-падарункі-picture-26908](/upload/resize_cache/iblock/386/454_302_2/386a57342f35a25fdd84da5594cec1ae.jpg)